【Viu】樂壇天后Kelly陳慧琳一連兩場《陳慧琳Season 2 演唱會 澳門站》，今晚喺澳門銀河綜藝館開鑼，頭場演出Kelly狀態大勇，一開場即以連場歌舞炸爆舞台，令現場瞬間被炒熱！Kelly相隔4年強勢回歸，今次澳門站嘅製作亦落重本，除咗喺舞台特別搭建咗一間通心白屋外，影像上亦營造出準備作戰嘅狀態。Kelly喺開場時披上黑色戰袍，配以金色后冠，聯同16位Dancers喺白屋前載歌載舞，唱出《Ask》同埋《都是你的錯》，十足十皇后出征一樣！而喺《Ask》中段，Kelly更卸下戰袍同后冠，以一身性感金色泳衣款式嘅舞衣示人，超高衩大晒修長美腿，高貴氣質同霸氣盡現！
唱完兩首歌後，Kelly即問台下Fans：「型唔型呀？鍾唔鍾意呀？請俾多啲掌聲跳得咁落力嘅Kelly Troop！好耐冇見喇！」Kelly表示上次去澳門開Show已經係2019年，「4年裡面變化好大，發生好多事，但你哋對我嘅支持有冇變到先？」Fans都報以熱烈尖叫同歡呼聲。Kelly又解釋演唱會叫Season 2，亦代表住佢嘅重新出發，「呢個演唱會應該Show一個進化咗嘅我出嚟，即係Kelly 2.0，因為唔進化就退化，所以可能亦因為自己係處女座，不斷Chur自己，拎最好嘅嘢出嚟。」除咗澳門同香港Fans外，亦有來自台灣、北京、上海、廈門、青島等地，令Kelly驚喜萬分表示：「我嘅Season 2開始喇！」
