【Viu】《情牽煇黃經典演唱會2023》噚晚尾場，眾唱家班熱唱已故「樂壇教父」顧嘉煇同黃霑樂章下嘅經典金曲！不過本來喺演出名單上嘅葉振棠，因為生蛇身體不適而缺席尾場表演，所以葉麗儀就搵嚟好姊妹陳潔靈jam《倆忘煙水裡》，仲帶動埋全場fans互動，指揮兩邊扮原唱嘅關菊英同關正傑添！
至於壓軸出場嘅「Liza姐」汪明荃，繼續以雪白皇后look現身，勁唱多首琅琅上口嘅金曲，唱到《萬水千山總是情》嗰陣，仲邊唱邊揮動佢件毛毛斗篷，勁風騷呀！最後各位唱家班再次上台同fans大合唱《獅子山下》，氣氛超high唔好講笑！
