【Viu】向來鍾意亂抽水又搞作多嘅林作，被保險公司炒魷後，早前轉投加密貨幣投資市場，並喺9月以約26萬租用中環娛樂行一個逾2,900呎單位，開設場外兌換所（OTC）「林作炒幣」。
開檔唔夠半個月，林作就捲「綠石數字資產平台」（JPEX）串謀詐騙案被捕，被扣留喺中區警署兩日一夜，19號晚鬼祟由女友裕美調虎離山從後門離開，被網民指龜縮，但佢今日暗示係「警民合作」先咁做！
林作今日帶埋律師喺中半山麥當勞道寓所舉行記者會，表示自己冇被控告，亦表明已請咗資深大律師幫忙。但對案情細節就統一唔回應，更稱希望警方還佢清白。對於「林作炒幣」嘅業務，林作話前日已終止。其間佢話自己「非常苦惱」，更透露媽媽好擔心佢，同時大讚裕美係好女友。
而圈中同捲入JPEX案嘅仲有張智霖、莊思敏，曾獲JPEX宣布為香港區品牌大使嘅張智霖，噚晚由經理人公司代發聲明，指佢於19號被警方邀請協助調查。而張智霖聲明中稱去年得悉JPEX俾證監會列入「無牌公司及可疑網站名單」後，就喺舊年9月終止合作協議。
另外莊思敏曾喺YouTube上載影片推介JPEX，佢噚晚由大馬返港，即到警察總部助查，佢同張智霖一樣冇被捕，亦發咗聲明。想知更多，入嚟睇片啦！
