【Viu】天后Kelly陳慧琳噚晚打扮靚靚出席包包主題活動，仲借出13個私人珍藏手袋作展覽，佢話最深刻嘅包包係喺28年前拍「歌神」張學友《這麼近那麼遠》MV嗰陣用嘅背囊。「包包控」Kelly自稱屋企冇過百個手袋，早前亦攞咗好多去二手拍賣，見反應咁好，佢心思思想再搞多轉，無奈屋企已被清倉，咁就又有藉口shopping啦！Kelly話老公唔會反對佢買名牌袋，但就成日揶揄佢被呃！
近半年見Kelly報復式出歌，以為佢開演唱會嘅日子不遠矣，點知Kelly話仲未入紙申請場地，預告最快明年，下半年會繼續用新歌「轟炸」大家！不過，fans又唔使失望，Kelly透露喺7月頭會有個維港水上音樂會，首次喺船上表演，叫大家好好期待咁話呀！
