【Viu】黃夏蕙噚晚同老公潘炳烈喺尖沙咀酒樓筵開80圍，慶祝結婚35周年，劉錫賢、潘志文同丁羽等都有到賀，夏蕙BB仲以性感婚紗Look示人，難得佢仲話平時都性感開，只係碎料一碟！夏蕙姨受訪時大方分享夫妻相處之道，身在外國嘅仔女都會再同佢哋慶祝，仲自爆返港後工作多籮籮，仲揚言歡迎各樣廣告斟洽，無論真髮、假髮都殺，就算扮學生妹都ok呀。咦，咁全裸又得唔得先？佢就話要睇錢份上喇，如果有7位數字當然ok，喂！聽落又幾抵用喎！
此外，夏蕙BB話準備拍自傳式電影，希望打動老公客串，又笑言私藏咗大量年輕時嘅泳裝相，留返喺電影度公開，聽到都有畫面呀！講到Nel Nel逝世，佢話Nel Nel係自己個仔嘅同學，都有10年冇見，所以唔評論Nel Nel家屬同肥媽嘅紛爭。
