【Viu】Strayz成員Nat何榛綦最近推出solo歌《Time To Fly》，以個人姿態勇闖樂壇，Nat喺新歌入面借蝴蝶蛻變歷程，分享自身經歷同時，亦希望鼓勵大家勇敢去闖，跳出舒適圈去追夢！首次推出個人作品，冇晒隊友喺身邊，Nat一開始都有啲緊張同唔習慣，仲自爆錄新歌嗰陣，因為唱唔好而喊住離開錄音室添，呢件事亦令佢發現隊友嘅支持真係好重要啊！不過有窩心時刻，當然亦有想反白眼嘅時候啦！Nat大爆Ariel錄新團歌嗰陣瞓著咗，條track仲收晒佢啲鼻鼾聲添！真係笑爆嘴啊！
而講到偶像Edan，Nat就話好想好似對方咁，可以喺鏡頭前咁放同做自己，仲話希望可以喺音樂、影視同綜藝方面同對方合作！唔知Nat呢個心願，幾時實現到呢？
