【Viu】港台主持鄧添樂憑住喺節目《香江暖流》嘅「極速15秒」環節中嘅淡定，專業表現近日喺網上爆紅，連星爺都轉發俾Like，真係超威威啊！其實樂仔畢業後加入電台已經超過8年，雖然好多人覺得佢咁後生走去主持長者節目會唔會有啲局限咗自己，不過佢反而話學到好多嘢，特別係同老友記嘅相處之道，令佢而家面對未來外父外母都更加得心應手，仲話可以服務一班哥哥姐姐係佢嘅福氣，呢個女婿真係揀得過啊！
講到做節目嘅難忘回憶，除咗試過有老友記特登過嚟廣播道送零食俾佢，而佢仲好記得一班老友記嘅喜好，其中有位「神徒」婆婆更加令佢記憶猶新，佢哋仲一齊唱過「Uh-Oh Uh-Oh Uh-Oh」添！
