【Viu】姜濤隻腳好返之後，呢排都忙住出trip工作，繼早排同隊友Jer、Jeremy去日本之後，前日又飛去新加坡。噚日喺出席品牌活動之前，姜admin同工作人員忙裡偷閒，參觀當地著名景點Gardens by the Bay，姜admin又post咗一張舉V嘅相，見佢著上短褲仔激罕曬出雪白嘅小腿啊！
而喺噚晚出完活動之後，姜admin返酒店開live，接近6分鐘嘅live入面，佢全程影住自己個靚仔樣。其實出名孝順嘅姜濤，今次都帶埋屋企人去旅行，喺開Live期間，著住浴袍嘅姜媽亦大方入鏡，開心同阿仔一齊舉起V字手勢。姜admin又陪姜媽同姨媽去酒店泳池游夜水，小寶亦好擔心媽媽嘅安全，所以全程望到實兼不時伸手拖住姜媽，勁sweet啊！之後又嘗試幫姜媽影返幅靚相留念，但佢就自認攝影技術唔到家，並寫上：「兒子拍照還是不行，大家以後要生女兒。」姜admin恨生女恨到出曬面喎。
