【Viu】喺《季前賽》入面飾演老闆仔嘅Sean黃梓樂演出經驗豐富，而家9歲嘅佢，淨係今年已經有四套劇出街，包括《940920》、《反起跑線聯盟》、《野人老師》同埋《季前賽》。Sean今次做高家孝嘅細佬，同姜濤有唔少對手戲，而且要打鬧哥哥，都幾大挑戰㗎！而飾演晴晴嘅Bean楊千攸，雖然係演戲初哥，但已經周身刀，細細個已經學彈琴、溜冰、空中瑜伽同拉丁舞，喺劇中對住爸爸Stanley一啲都冇怯場，仲要話喊就喊。兩位小朋友都異口同聲話好鐘意同MIRROR、ERROR合作拍劇，無論姜濤、Stanley、Edan、193、抑或肥仔哥哥都非常照顧佢哋，Sean同Bean仲視佢哋為目標添！！
