【Viu】神級雙影帝組合梁朝偉、郭富城主演嘅《風再起時》噚晚舉行首映禮，期間城城分享一shot直落怒摑朝偉嘅難忘場口，感覺似演舞台劇。未接觸過樂器嘅朝偉話收到導演指令要彈三首歌，點知拍完就從此愛上，到最後仲真係買咗部琴返屋企想繼續學；而城城就挑戰跳踢躂舞，火花十足！佢仲識英雄重英雄大讚朝偉：「影帝中嘅影帝，世間只有一個！」朝偉承諾若然時間允許都唔介意現身謝票，城城甚至諗定福利回饋fans添！
Jeana何珮瑜指好榮幸喺戲中飾演朝偉嘅老婆，仲有超緊張嘅kiss戲，佢又憶述拍攝嗰期佢要剝智慧齒，朝偉每次見到佢都愛心問候，搞到佢鬼死咁冧！至於吳卓羲就話同城城最多對手戲，指同天王合作最深刻一次，係首次同場坐低被對方眼神嚇窒以為得罪咗，點知其實城城早已入戲。
