【Viu】本身係雙魚座嘅獨立歌手阿Mic周卓盈，早排推出咗第一首單曲《雙魚座》，雙魚座星座嘅人係浪漫主義者特別鍾意FF，阿Mic寫呢首歌嘅時候佢仲好細個，一個未接觸過愛情嘅妹豬，心目中已經有一大班對象！阿Mic又話雙魚座嘅特徵係記性差，就算經歷唔開心嘅事都會好快忘記，所以佢對愛情仲抱有期待，阿Mic雖然滿腦子都係幻想對象，現實中其實非常專一。阿Mic有深厚嘅音樂底子，中學踏過台板唱粵劇，之前仲參加過唔同嘅歌唱比賽，包括兩屆《全民造星》，呢個舞台令阿Mic不斷進步之餘，佢亦搵到一班志同道合嘅朋友。
