【Viu】Endy周國賢 22歲結婚生女先正式出道做歌手，俾好多人都行得早。不過今年42歲嘅Endy，噚晚趁處男紅館騷尾場後接受訪問，宣布同韓籍老婆李美英已離婚逾1年，但Endy講明「我哋依然深愛對方，我依然會盡責任。」再問三個囡囡嘅撫養權歸邊個？Endy就話唔想講。
入行18年先第一次踏上紅館舞台，Endy既感觸又興奮。噚晚尾場，由8點半唱到凌晨1點，真係抵到裂。佢全晚爆喊咗至少5次，唱完頭一輪Rock爆歌同Fans熱身之後，Endy就話：「唔好意思要大家等夠18年。」之後再連續兩次講唔好意思，「我知自己唱歌又唔係特別好，上到嚟真係好開心。有啲人1、2年就上到嚟，唔係冇原因，以前我身在福中不知福，上天好公平，俾咗好多次機會我，之後佢拎走咗我好多好多嘢，到依家先上到嚟！呢18年我失散咗啲戰友、團隊、屋企人，我感恩同我走過呢18年嘅人，無論生離死別咗嘅屋企人。」唔知是咪諗起老婆，隨即爆喊。
噚晚Endy無懼俾紅館罰錢，3度encore，佢搞笑話：「我夾啲囉！同隊band每人夾啲囉！」第1度Encore時，Endy特別多謝父母，「佢哋嚟足3晚，但我細佬周國仁，今次係第一次嚟睇我開騷。」到第3度Encore時，樂隊ToNick出場，主音恆仔同Endy合唱二人合作嘅電影《一秒拳王》主題曲，全場勁Hyper。ToNick落台後，兄弟班Zarahn再次上台，總之全晚就超正啦！
