【Viu】出道18年嘅Endy周國賢終於踏上紅館舞台，由噚晚起連開三場處男騷，頭場台下有謝安琪同老公張繼聰、游學修同女友Jessica拍拖睇騷，而許賢就一支公到場做「電燈膽」啦！
甫開騷先有多位戴住Endy面具嘅「孖生兄弟」上台，而染咗灰色頭髮嘅真身Endy喺起歌嗰陣就除低面具，自彈自唱《第一次》、《Children song》，一嚟就彈結他騷quali！繼而Endy走到台邊嘅鳥籠裝置入面換衫，露出一雙麒麟臂，又勁hyper咁跑勻成個台，全場fans即刻企起身迎接，場面high爆！
上紅館呢個機會咁難得，Endy當然要預埋樂隊Zarahn啦，佢仲請埋ToNick做嘉賓添！同恆仔合唱完仲突然向對方送上「厚禮」答謝，睇到全場嘩嘩聲！而喺頭場裏面，Endy多次哽咽之餘又有爆喊，真係好感觸！
