【Viu】Will柯煒林同Dee姐陳海寧今日出席品牌活動，大學年代已經相識嘅佢哋，首次一齊出event就互爆秘密，除咗當年一齊打機打到天昏地暗，Will仲踢爆Dee姐冇洗頭去Casting，仲保證友情堅過石堅，就算裸體瞓埋一張床都唔會出事咁話！
憑《濁水漂流》提名金像獎「最佳新演員」同「最佳男配角」嘅Will，得獎信心係一時時，最想多啲演出機會，又慨嘆自己老喇，再唔拍多啲戲就夠鐘退休，認真搞笑！Dee姐就話全隻手都係肉，因為自己同梁仲恆、鍾雪瑩都好Friend，今日同場就焗揀柯煒林啦！Will又讚Dee姐揀仔有眼光，當年介紹吳肇軒參演知片，結果畀軒仔嘅演出震懾，搞到當年想轉型做演員嘅Will自慚形穢。
