ViuTV超人氣組合 MIRROR 同 ERROR 近期去到邊都有人談論，踏入暑假學生粉絲更多時間追星，各大品牌梗係唔會放過大好機會，幾乎每隔兩日就有16子嘅廣告宣傳活動，粉絲們嘅熱情一焫即著 ！
Photo / FB@我老婆嫁左比Mirror導致婚姻破裂關注組
Photo / FB@我老婆嫁左比Mirror導致婚姻破裂關注組
呢兩日鏡粉們有排忙，首先姜濤代言嘅月餅今日 (22日) 正午開售，姜糖們晨咁早已經去到唔同分店排隊，未開售已經有黃牛黨將兩款「姜濤月餅」放上網炒，原價548元索價650元至2,000元都有，品牌下午兩點零鐘喺FB 宣布已經全線售罄。
Photo / FB@我老婆嫁左比Mirror導致婚姻破裂關注組
Photo / MIRROR粉絲
掃完月餅，姜糖又要搭車去金鐘太古廣場，事關姜濤同Ian 陳卓賢一齊出席國際名牌活動，現場嘅姜糖同Hellosss們聲勢浩大，遲少少到真係連兩個鏡仔嘅頭髮都見唔到！
Photo / ViuTV
Photo / FB@我老婆嫁左比Mirror導致婚姻破裂關注組
Photo / FB@屯門友
以為追星目標已完？咁就錯喇，粉絲們吶喊完一輪，又要舟車勞頓入屯門霸位，因為聽日 (23日) MIRROR＋ERROR 16子，中午12點會齊齊現身屯門市廣場1期1樓中央廣場，出席ViuTV《夏日電視賞》記者會，有網民話今日得兩子出活動都咁墟冚，聽日粉絲總動員，數目會幾何級數咁增加；仲話有唔少粉絲已經拎摺櫈、地墊到場霸位，連中央廣場樓上嗰層都已經被摺櫈侵佔，一眾「屯門牛」笑言好「絕望」，勁驚屯門聽日會陸沉。
有傳媒數過，今個七月MIRROR 12子至少接咗36個廣告，包括護膚品、洗頭水、時裝、名牌袋、首飾名錶、冷氣雪櫃、保險、餐廳甚至連成藥都有，幾乎全部都係一線品牌，認真巴閉。
鏡粉們瞓身支持偶像，代言產品次次都賣到開巷甚至斷貨，識做生意都梗係搵佢哋喇！ 鏡粉們見到偶像心心眼，鏡仔們豬籠入水人氣爆燈，本來係皆大歡喜，只係難為一眾鏡粉嘅老公、男友、爸爸買到手軟荷包乾塘，日日喺苦主GROUP 圍爐叫苦連天！
