ViuTV超人氣組合MIRROR、ERROR今日中午將會合體，現身屯門市廣場ViuTV《夏日電視賞》記者會，一眾鏡粉同404 提早一日到場霸位，除咗會場周邊，對上兩層都滿佈摺櫈、地墊、A4紙甚至行李篋霸靚位，由於粉絲實在太熱情，網上一度有傳言指商場擔心安全問題，考慮取消活動。
Photo / FB@我老婆嫁左比MIRROR導致婚姻破裂關注組，聲稱清晨5點情況
據知商場保安噚晚11點清場，粉絲唯有留守商場外，有準備十足嘅粉絲甚至租咗附近酒店留宿，養精蓄銳今朝再嚟搶佔有利位置，酒店房價炒高成倍，相當誇張。另外，亦有粉絲Book定商場二、三樓望到會場嘅餐廳玻璃位，希望「邊食邊睇」，不過聽聞唔少人已經收到餐廳通知要取消訂位，相信係擔心粉絲太熱情，隨時逼爆玻璃樂極生悲。
Photo / FB@屯門友
Photo / FB@屯門友
FB「我老婆嫁左比MIRROR導致婚姻破裂關注組」發起人RC，搞笑發出「黑色姦夫警告訊號」，提醒一眾「前夫」今日避免進出新界西北部，一旦不幸被「前妻徵召上陣，記住著輕便裝束兼做好熱身」，又呼籲粉絲們保持理智唔好推撞。
Photo / FB@屯門友
「前夫」們抱怨、尋妻聲此起彼落，屯門居民亦都相當頭痕，有屯門友話已經準備足夠糧水，今日閉關唔出門，要返工放工就會兜路行，避免被瘋狂粉絲踩親腳或震爆耳膜！更有網民喺討論區指，有疑似屯門居民不滿粉絲聚集滋擾，揚言中午會去屯市扔雞蛋「保家衛區」，不過帖文好快已被刪除，希望只係講吓笑。
希望各位粉絲同屯門友互諒互讓，最緊要注意安全呀！
Video / 網上片段
