【now.com娛樂】都唔知幾耐冇聽過劇集打對台呢回事，自從ATV積弱，弱到拍唔到劇，HKTV又開唔成台，直到ViuTV嘅《綠豆》先叫做打開電視有另一套港劇揀吓，不過播出時間比較夜，《午夜伴廊》我又冇睇。好啦今晚興奮喇，黃金時間有套《詭探》出街，唔覺意打到正大台嘅《蘭花刼》首播。不過兩個台都冇乜打對台氣氛，一來ViuTV冇標榜呢回事，二來大台套劇都唔似攞嚟打仗嘅材料，所謂打對台，可能都係我呢啲好事之徒先有少少感覺。
《詭探》有乜咁特別呢？對我嚟講，都吸引㗎。由細到大，一直鍾意聽香港各式都市傳說，雖然都唔算識得好多，但每個都聽得津津有味。《詭探》一嚟就話有九廣鐵路廣告事件，呢件事對於7、80後來講，當年可說驚天動地，一班細路搭膊頭玩火車，可能剪接得差，傳吓傳吓成為鬼故。最恐怖係，當年個傳聞越傳越恐怖，個廣告就晚晚播出，唔驚就假。
呢個都市傳說當年震撼全香港，仲勁過?家成日傳嘅西貢結界好多（《詭探》好似都拍埋西貢結界），屬於香港人集體回憶之一。當年係1993年，?家2017，相隔足足24年，呢個題材其實應該一早拍啦！好似話仲有高街鬼屋，我細個就係住嗰度附近，當時都仲未拆，人人都話係鬼屋搞到我成日要兜路行，呢個又係勁有興趣睇。卡士我接受到，邵仲衝我麻麻，但尹揚明真係好耐冇睇，仲有車保羅同河國榮，我最鍾意就係睇呢啲配角。
反觀大台套《蘭花刼》，就令我有少少反胃，我覺得真係要好睇對手唔起，先會在人哋出新劇嘅同時，擺一部拍咗十年嘅倉底貨嚟交差。話係倉底唔止係講緊十年咁簡單，而係呢套劇根本就放過喺收費台播出，原本已經當垃圾咁送出去，突然又攞番出嚟當上菜。
唔敢話呢套一定唔好睇，但我唔理你田蕊妮蘇玉華幾好演技都好，擺低十年都唔播就一定有原因。睇人唔起係一個問題，另一個問題係，十年前嘅劇仍然可以在今日黃金時間播出，證明呢十年都真係白過，完全冇進步過。即是如果呢套放深夜時段，我唔會有意見，放黃金時段就真係令人覺得，呢個黃金都冇幾黃金啫！算啦呢個台經常都令人摸不著頭腦，講多無謂，今晚又睇吓咩情況囉。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
