【now.com】盛傳李克勤將會離開合作18年嘅環球，3000萬巨額加盟英皇。對於克勤來講，我覺得係好事啊。唔係話環球唔好，我一直覺得香港兩間唱片公司，做歌手形象特別出色，一間環球，一間華納，國際公司係唔同啲。
但市場轉動得好快，而家巨星轉會，基本上得兩個選擇，一係英皇，一係寰亞，因為呢兩間本地公司做大陸線真係做得最好。尤其英皇，陳偉霆都可以做到上大陸一線喎，同埋真係一張白紙咁捧佢上去而家個位置喎，你估咁容易？環球都有發展大陸線，但仍然跳唔出選秀節目，Robynn & Kendy突然爆紅，克勤自己都有參加蒙面歌王，但貌似走不出廣東省。
你話咁都唔使拆散左麟右李呢個金漆招牌啩？兩條友新年開騷場場爆滿仲即場逗埋利是，唔爽歪歪咩？一來紅館農曆新年檔期唔係咁易搶到，二來而家已經唔流行門戶之見，有錢搵，咪一齊賺，一個環球一個英皇都可以照開左麟右李㗎，克勤同祖兒舊年都可以合體開騷啦。
3000萬固然係一個好大考慮，但唔係最大，我相信香港仲有其他公司出得起呢個數俾李克勤，可能環球自己都offer到。不過作為歌手，佢點跑返呢條數呢？就好重要。好似同樣簽咗巨額合約嘅陳奕迅，就係最出名嘅樂壇跑數咕喱，一年到黑巡迴世界開演唱會，佢當打之年，仲有氣力咁賺。但克勤唔細，仲要係深閨人，生活淡泊，愛家庭生活，佢又需唔需要為一筆錢咁樣犧牲晒自己生活呢？錢係緊要，但你都要有命享先得。
咁係咪簽英皇或者寰亞就唔使跑數呀？唔係，但呢一刻來講，相對舒服好多，因為酬勞唔同。樂壇走下坡後，演唱會曾經係香港歌手最賺到錢嘅項目，但已經唔再係喇，因為有更賺錢嘅項目出現咗，就係北上大陸上電視。唔係拍電影，拍電影機會少，電視而家真係玩晒，真人騷又得，拍劇又得，只要你有名氣，而間公司又幫到你接好騷，一年花兩個月時間上去搵錢，一定多過你巡迴一年。
咁有得揀，點解唔做兩個月休十個月先？而家係老一輩藝人搵錢嘅黃金時代，打開娛樂版，好多大星唔知去晒邊，你以為佢哋休息緊，量緊地，其實好多都掘緊金，冇同你講啫。
其實克勤在大陸可以好紅，趙薇三年前部《致我們終將逝去的青春》，拍大陸人集體回憶狂收7億，片中有用到克勤首《紅日》，出嚟個反應好到唔知點形容。即是佢影響力係好到好北，但發展就停在南邊，咁唔對路喎。轉過間公司，佢仲有得繼續發展，香港市場一早已經飽和，佢都十幾廿年冇點樣發展過啦，對一個歌手來講，點會唔吸引？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
