【now.com】香港人愈來愈鍾意睇Show，鍾意的程度已去到逢飛必搶，逢唱必爆，$680張飛可以炒到上3、4千。於是麥當娜先下手為強，索性率先自炒，票價高至過萬蚊一張，不過見慣大場面的香港人依然臉不紅、氣不喘，同你掃清。
當然，唔係個個都係麥當娜，而一個歌手就算再受歡迎，每隔兩、三年又開一次個唱，一來未必夠新歌，二來新鮮感從何來都是問題。所以自譚詠麟、李克勤兩師徒十數年前合作開了個《左麟右李演唱會》大受歡迎後，Crossover成為一個強而有力的結盟，以雙倍的號召力將兩者歌迷合併。同一條橋，已經搭通過90年代已經玩到熟透的軟硬 x 草蜢、Big Four的四位老死、《古惑仔》一班洪興手足，還有剛剛開完的李克勤 x 容祖兒。幾個牌面，出師有名，一看就通，令人期待。
這方程式，來到今天依然熱炒中，單單是今個年底，就再有三個不同的組合開Show同大家見面，只係組合上來理由好似冇上述幾個經典那麼易明，出師之名又似乎得個名欠實在，難免影響了觀眾的期待指數。為免大家錯失幾個精彩個唱，實在有需要在此幫大家解解畫，將他／她們的潛力徹底地燃燒出來，給你一個買飛的理由！
首先有11月17-18日假九龍灣Star Hall開Show的《我的女神演唱會》，演出歌手包括盧巧音、林志美、麥潔文、徐子珊、余安安？夏文汐！宣……萱？除了開首幾位是唱歌出身外，其餘都係演戲為主，似電影電視劇卡士多過演唱會喎！嗱，你咁諗就全中喇！主辦單位就正正想集齊那些年無數經典劇集或電影中的女神，唱出陪伴港人成長的經典主題曲。係咪原唱唔緊要，最緊要由女神把口唱就掂晒。而且7位女神 x 7個那些年感覺，足足有七七四十九種韻味，口感豐富。
去到11月27日-29日紅館，有《男人幫演唱會》，蘇永康、梁漢文、任賢齊加黃家強，呢個陣容係咪有點熟悉但又有點異樣？其實就係半隊Big Four加兩位新血。Big Four Sell兄弟情，四位出道friend到現在，捱過患難共過富貴，四位一站上台，就有種不能言喻的感情湧出來。至於男人幫，黃家強來自Beyond，後來作獨立發展，跟幾位之前的合作有……呀……好似……不如講講小齊先，台灣朋友，由對面海紅到來香港再直登內地，曾經同幾位……um……ah……其實友情向來都係從經歷累積得來，冇第一次合作又何來有日後的兩脅插刀？就等大家入場去見證幾位的友情結盟。
去到聖誕過後，12月27日，有另一個同女人掛帥的演唱會在灣仔會展開Show，名為《女人謎演唱會》，人腳有李蕙敏、林曉培，以及樂壇新人丁悅。至於點解挑選這幾位歌手合作，除了因為同公司關係，亦因為她們是女人！我無講錯，因為製作單位表示女人是充滿謎團的動物，男人摸不清，連女人都未猜透，所以就想靠幾位女歌手的歌曲，讓觀眾睇完呢個演唱會後，進一步解開這個跨世紀謎團。這個說法收貨嗎？我就No la！點都要加埋謎女王羅蘭同謎女郎呂慧儀先似解謎嘛，你話啱唔啱先！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
