【now.com】昨日傳出張敬軒（軒仔）因個人理由退出《我是歌手4》的參賽。雖然沒有說清楚理由是甚麼，但單單「個人理由」四個字已令人對號入座，肯肯定跟過去曾支持反國民教育同撐佔中有關啦。為免出發途中要折返，於是索性自行退出來個一乾二淨。不過直至昨晚，張敬軒的經理人霍汶希表示絕無此事，甚至指從無落實過參與該節目，所以無可能「被退出」。軒仔更透露的確曾有真人騷邀請他，但並非《我是歌手4》。
怎樣都好，所有網民都樂見這個現狀。沒誇張，的確是所有！向來支持軒仔敢言的，當然慶幸偶像沒有為登上這個多事舞台，而被逼放下建立多年，得來不易的個性。再者我們已經好清楚張敬軒是位專業歌手，毋須以叫喊式歌藝去證明吧！至於攻擊他的，也開心樂透，心中一句句︰「抵死！冇得去搵人仔。」「知衰未？睇你仲敢唔敢亂講嘢！」不戰而勝，又是另一種暢快。
那麼未能上大陸搵錢的香港歌手，係咪就注定餓死呢？自己都思考了一陣，多得同一晚，旅發局主席林建岳立即給予我一個答案：「唔係！你哋仲有齋食。」話說林主席昨日出席記招，宣布除夕夜又放1,300萬元煙花之餘，更向香港市民訓示一番。佢形容中國市場是一塊肥肉，各國都爭住搶，偏偏香港愛食齋，咁自然會瘦，自然要勒緊褲頭度日。
實在不想凡事都以兩代人溝通唔到來作解說，但林生這個所謂「強而有力」的理據，又真係太Old School喇嘛？今時今日仲以為用肥膩高脂的五花腩作比喻，就會引起大家垂涎，清淡健康的素食肯定會令大家倒胃？你未免是以個人飲食喜好套落大家的舌尖吧！難怪你又係使出煙花匯演呢招去吸引遊客。
其實大家冇吃過肥肉嗎？沙士後中國開放自由行，我們便曾經擁抱過這團肥肉十數年，個個吃得肚滿腸肥，肥到懶得思考，一味開金舖、藥房、化妝品店、電器店，個個賺人仔自肥。結果整個社會食到出現高血脂、高血壓、高血糖，臨近爆煲邊緣。現在得到各方把脈診症後，認為係時候食清啲調理一下，多吃蔬果會對身體好，會襟玩啲。現在林主席用齋菜來形容少了自由行旅客後的香港市道，豈不是對正胃口，應該多吃身體好喎！林主席，你原來在報喜喎！
肥肉是可口，但愈可口的食物愈不健康，偶然淺嚐還可，經常大口大口地吃就等於慢性自殺。軒仔今次未能一嚐這口肥肉唔緊要，香港樂迷願意同你勒緊褲頭，一齊腰板挺直地吃個開眉齋，又如何！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
