【now.com】黃家強跟梁振英一張世紀合照，加上一次夢幻合唱《光輝歲月》，幾乎被全世界鬧到體無完膚。我覺得唔係咁囉，今次點都要為佢平反。
咁佢都要搵食㗎，大家都知在香港搵食係最緊要的，冇得食會死㗎，死咗仲點講信念？好多人以為家駒留低好多錢俾黃家強，其實冇人知有幾多，可能好少呢？靠自己玩音樂，又唔搵得多，才華又唔多，有都被家駒陰影遮住；出碟又唔賣得，bass同結他又唔係勁，唔可以好似黃貫中咁做結他之神；開公司簽Kolor又搵唔到錢，分分鐘要蝕呀。幾年開一次Beyond合體係和味，但唔使分呀？以前家駒嘅版稅仲難計，佔領日日唱幾十次《海闊天空》，都唔知有冇俾過錢囉。
收入少，洗費又大，黃貫中以前話過黃家強好揮霍，實際係點唔知吖，但佢買隻有時差嘅錶都30萬，買隻準時嘅應該唔止啦，佢仲要養家，照咁睇皮費都唔輕。人哋阿哥走咗照顧唔到佢，想自力更生但同特首唱首歌都唔俾，咁係咪你養佢啊？
同埋唔係黃家強攬住梁振英集郵㗎，係梁振英埋伏黃家強逼佢影㗎，有人話家駒仲在生的話，一定唔會有呢件事發生，咁梗係啦，家駒在生點會簽林建岳呢？點會去呢個晚會呢？全隊上晒岸環遊世界啦，仲響度捱騾仔咩，攞嚟講。
俾你，你會點招架呢？梁振英衝埋嚟，唔通黃家強遇到侵犯，要大聲話唔好？做人要有禮貌嘛，你估rock友就成日都要咁rock？分清台上同台下啦好嘛，成熟啲啦香港人。
其實都係影張相，唱首歌仔啫，舊年謝霆鋒搵3000人整雞蛋仔，破世界紀錄，個活動叫《齊撐香港創紀錄》，《十二道鋒味》都有播，直頭搵梁振英上台主禮?啦，又唔見謝霆鋒被人咁鬧法，即是擺明搵錢就得，做個樣暗啞底搵錢就唔得，係咪要逼佢連個樣都唔做呀而家。
黃子華都有教人生三大矛盾，高官特首同台唱K，咁黃家強係專業歌手嘛，搵食啫。《光輝歲月》寫俾曼德拉咁又點？唔唱得㗎？犯法呀？唱唱吓梁振英上台逼佢合照，咁都要笑住影啦，我想㗎？你解決唔到人生三大矛盾，就想解決黃家強，欺善怕惡囉你哋！
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
