【now.com】每當你知道有朋友的職業是娛樂記者或攝記，通常第一句就會問：「咁咪日日見到明星囉？」的確，做娛樂行業每天都會接觸到不同「藝人」，但真正稱得上「明星」的就必定是80、90年代，香港娛樂圈最輝煌時期的藝人。
六位90年代入行的娛樂攝影記者為紀錄這段光輝歲月，出心出錢又出力，在旺角一唐樓舉行為期8日的「娛記正傳（上集）」圖片展，展出多張經典明星相、絕版明星雜誌、Yes!卡機（真係有得扭Yes!卡）、收藏品、佈滿粒粒巨星簽名的牛仔褸等等。
其中一位有份策劃的攝記仇志德，尋回廿多年前儲起的菲林，將底片掃瞄到電腦後再加以修復，沖曬多張由他按下快門的明星相，他表示：「揀相揀到傻，畢竟係講傳媒，我想揀可觀性高啲，新聞性啲嘅圖片，例如許志安同鄭秀文著裙褂結婚相，其實張相係演唱會造型，喺文化中心影。但佢哋結婚都冇發放過圖片，就算佢哋有著我哋都見唔到，所以呢張相好有趣。」
「又例如郭富城同張學友嗰張，係喺商台搞嘅水運會，佢哋同時出現喺泳池邊，而家真係冇機會再見到。仲有Beyond四子，我入行只係見過兩次佢哋4個一齊，當時佢哋已經去咗日本發展，咁啱返一返嚟，而家已經冇得再影。」
叫得「上集」，是否會有「下集」？阿德說：「大家諗就梗係咁諗，當然期待有，呢幾日好多支持者都問係咪會有，其實只係鋪定路，再睇吓大家想點搞，或者搵唔同年代記者提供多啲嘢。」
要尋回廿多年前的相片、刊物和收藏品絕不簡單，他表示：「今次籌備咗大約9個月，但兩年前已講緊想搞。最主要想對呢個圈有個見證，見證香港最輝煌嘅娛樂圈，嗰陣真係好黃金明星時代。」
「紙媒雖沒落，光影可留情」，今次圖片展展出的不止是回顧昔日的光輝，更展出明星和攝記間的友情。劉德華、譚小環、黎瑞恩、古天樂、梁詠琪、陳松伶等人都出力支持，華仔甚至親筆題字，並設計成一份報紙《華報》，絕對有心思！「娛記正傳」現正免費開放，襯仲有幾日大家可以去懷緬一下，保證驚喜處處！
「娛記正傳」上集
日期：2015年11月1日－11月8日，12nn－7:30pm
地點：旺角太子道西204號2樓 走馬燈
入場費：免費開放
採、攝：何愫盈
