身為曼聯迷的他力撐C朗。
(Instagram截圖)
【Now Sports】香港星級羽毛球手伍家朗近期忙於在外作賽，但談到EURO 還是興致勃勃，他表示最難忘基斯坦奴朗拿度在2016年奪冠，而今屆也支持葡萄牙。
「記得2012第一次睇歐洲國家盃，好記得嗰一年睇到揭幕戰（波蘭對希臘），仲記得係由波蘭射手雲杜夫斯基射入嗰屆嘅第一個入球。」家朗坦言愛看足球賽，但畢竟比賽與訓練大過天，歐國盃期間通常都在外地作賽，就算留港也有所節制：「因為每朝都要訓練，所以都唔會通宵出街睇波，好多時都係喺屋企睇當日嘅早場。」
被問到對EURO最難忘回憶，家朗說：「當然係偶像C朗，2016年奪冠嗰一屆同埋決賽嗰場波。雖然佢喺決賽好早傷出，但其他隊友拼搏到加時最後一刻，而且C朗亦喺場邊一直激勵隊友，最後奪冠個畫面，非常振奮人心！」
「今屆都係會支持葡萄牙啦，相信都係C朗喺歐國盃既最後一舞。」支持的是葡萄牙，不過他客觀認為德國最具冠軍相，而說到德國主將更是朗朗上口：「因為佢哋主場出擊，中前場又人才輩出，例如有穆斯亞拿、穫斯同埋哈伐斯呢啲新一代天才橫溢嘅攻擊球員，又有中場大腦卻奧斯帶領，相信會踢得好好。」
家朗最後希望今屆熱熱鬧鬧睇波：「最想同一啲鍾意足球嘅朋友一齊睇啦，一班鍾意足球嘅人一齊睇波，氣氛會好好多。」
【EURO睇波團】，決賽周開打前邀請名人或本地體壇名將分享對EURO的睇波經歷，以及對今屆的睇法。
下一位團友預告：施寶盛