香港網壇「一哥」Coleman黃澤林噚日出戰廣州南沙國際挑戰賽ATP 75級男單決賽，先贏一盤6：4，但同澳洲球手舒高基Tristan Schoolkate激戰2個鐘頭15分鐘後，以1：2反負摘亞，未能繼5月江西挑戰賽後再捧ATP獎盃。不過世界排名稍後更新，佢勢將首破前90位，創職業生涯新高，總算輸波贏排名。講完球場講情場，有網民發現佢身邊女伴極速「換畫」，新女友似乎係身高177cm嘅「籃球女神」Mandy譚旻萱！
黃澤林今年2月被爆同陳奕迅囡囡Constance陳康堤拍拖，4月公開認愛後，女方不時喺社交平台放閃，仲透露感情生活開心。不過本月初有網民發現康堤冇再現身黃澤林比賽，雙方仲互相unfollow，隨後黃澤林喺直播承認分手，聲稱依家專注打波。康堤噚日出席活動亦親認分手，並坦承情緒「會有啲低落」。正當事件似告一段落，點知黃澤林轉頭就被發現身邊多了Mandy相伴！
有網民喺南沙睇波時「野生捕獲」Mandy，話特意跑去睇黃澤林比賽，大讚表現超亮眼，仲話：「居然還偶遇了譚旻萱！本人好靚好白」。片中所見，Mandy全程專注觀賽，每當黃澤林得分都興奮歡呼，神情投入。賽後黃澤林走到場邊，兩人交談後態度親暱，有指黃澤林伸手摸Mandy塊面兼錫咗一啖，Mandy隨即甜笑。另有網民話今朝早影到兩人喺餐廳食早餐，之後Mandy再到球場支持「澤囝」，比賽完結即上前祝賀，非常甜蜜，網民留言「無縫接軌」、「情場如球場，換畫快過閃電」、「兩個都係運動型高挑男女，外型合襯」。Mandy經理人公司Cool Style就回應：「Mandy正在放假，公司不便代答藝人私生活。多謝關心。」
圖片來源：小紅書
