【A&M Diary】食鐵板餐或食板燒，嗰種「吱吱咋咋」嘅燒肉環迴立體聲，真係聽覺嘅美食享受！位於旺角嘅福岡漢堡扒，唔好以為為日本餐廳呀，其實福岡漢堡扒係韓國嘅過江龍餐廳，主打石燒澳洲和⽜漢堡扒。
芝士蛋蒜和牛漢堡扒（中）
福岡漢堡扒有多款套餐選擇，而我地嘅二人套餐當然唔少得餐廳嘅招牌漢堡扒啦！但嚟到福岡漢堡扒，想食就要自己動手燒。將適量和牛放上已經預熱嘅石頭上烹調，色香味隨即由冒煙嘅漢堡牛肉湧出，最後加上滿滿嘅雪花芝士，當融為一體之後，拉絲芝士嘅邪惡感十足，再夾上燶邊嘅雞蛋，確實非常滿足。
墨西哥辣椒和牛漢堡扒（中）
墨西哥辣椒出名火辣，遇上油香感十足嘅和牛估唔到充滿驚喜。辣椒口感有啲似榨菜，微辣嘅味道抵消咗和牛嘅油膩感，而辣味又冇搶走到和牛濃郁嘅肉味，非常惹味。另外，值得一讚嘅係每個座位都有獨立抽氣管抽走味道，食完都唔會成身燒肉味。
和牛乒乒乓拌飯
稍為打碎嘅和牛撈埋送飯必備嘅太陽蛋，加上帶有微辣嘅韓式泡菜醬嘅加持，順利清碗冇難度！
