大坑有唔少特色餐廳同cafe，啱晒大家放假去漫活同打卡啦！近期新開嘅Fatties Diner，餐廳設計充滿美國色彩，加上極高人氣嘅打卡奶昔同美式班戟，充滿罪惡感之餘又非常好味，所以呢度絕對係邪惡嘅天堂呀！
懷舊美式班㦸
Fatties Diner嘅班㦸選擇好多，鹹嘅甜嘅都有，想衝擊味蕾嘅，又咸又甜都有呢個懷舊美式班㦸嘅選擇。班㦸即叫即整，兩塊班㦸夾住煙肉同炒蛋，上面就有太陽蛋。班㦸用上3.6北海道牛乳製成，忘滿奶香。口感方面，軟熟嘅班戟配上脆口嘅煙肉同流心嘅太陽蛋汁，口感層次大大提升。至於斑㦸另外配以海鹽焦糖醬，又鹹又甜，夠晒過癮。
牛角包窩夫配熱帶青檸燒雞肉
牛角包窩夫帶有濃郁嘅牛油香味，口感非常香脆。配料方面特別揀咗熱帶青檸燒雞肉，青檸汁嘅點綴，為呢度食物帶嚟清新感覺，充滿泰式風情，估唔到同牛角包窩夫又出奇地夾！
LOTUS焦糖餅乾奶昔、青檸梳打
奶昔絕對係美國菜嘅代表食物之一，所以嚟到Fatties Diner點都要叫番杯奶昔！餐廳嘅奶昔造型隨機，所以每一杯都係獨特設計，夠晒驚喜，啱晒大家影相打卡啦！呢杯LOTUS焦糖餅乾奶昔，奶昔口感綿滑，杯邊為住焦糖爆谷，喺忌廉上邊仲有一塊熊仔餅，貌似熊仔瞓咗喺雲層上邊，仲唔係邪惡的天堂！另外一杯飲品，就叫咗青檸梳打，為今日呢個午餐，帶嚟清新消膩嘅感覺。
