【A&M Diary】講起食海鮮，唔知你會唔會諗起三聖呢？三聖有一條海鮮大街，大家可以即揀即劏，再去附近嘅大排檔即煮即食，絕對係港版築地海鮮市場呀！但如果想化算啲，推介屯門三聖嘅棠記海鮮小廚，直接去餐廳再揀海鮮同落單，同樣食到舔舔脷呢！
豉油王琵琶蝦
琵琶蝦大大隻，而精粹在於炸到脆卜卜又吸晒醬汁嘅蝦殼，最正一定要用手食，慢慢啜晒醬汁，再嘆埋彈牙又入味嘅蝦肉。至於蝦頭教有唔少蝦膏，非常鮮甜！食到最尾，記住唔好放過自己隻手指，要盡情啜埋佢呀！
豉椒炒蜆
首先一讚嘅係差唔多每隻蜆都帶有蜆肉，絕對唔會偷工減料。至於炒蜆夠鑊氣，蜆肉份量十足，粒粒都漲卜卜，非常鮮甜，加上豉椒汁，真係非常惹味！至於索晒醬汁精華嘅彩椒同洋蔥，都非常入味。
菠蘿咕嚕肉
嚟到棠記海鮮小廚，除咗海鮮之外，菠蘿咕嚕肉都係餐廳名物之一。咕嚕肉炸到鬆脆可口，而脆卜卜嘅外皮亦沾滿開胃嘅甜酸汁，而醬汁嘅濃稠度仲可以呈現拉絲嘅效果添，加上帶有微酸嘅新鮮菠蘿相得益彰！
蒜蓉炒白菜仔
