〈好食〉銅鑼灣台風味段純貞牛肉麵

【A&M Diary】無得飛就嚟轉味蕾小旅行啦！講起台灣美食，除咗掃街夜市，又點少得紅燒牛肉麵呢？今次同A姐去到源自台灣新竹市，位於銅鑼灣嘅段純貞牛肉麵分店，創辦人為紀念已故祖母段純貞所創立嘅品牌，而呢度嘅代表當然就係濃郁嘅牛肉湯底啦！

紅油抄手
紅油抄手色水夠晒紅，聞落仲充滿麻香味添！食落唔算太辣，香料豐富，好有層次。抄手裏面除咗豬肉，仲有蝦仁，令口感大大提升。

三寶麵
呢度嘅招牌菜當然係牛肉麵，但貪心嘅我哋就試咗三寶面，除咗腱心之外，仲有牛筋同牛肚，夠晒豐富。至於上枱嘅第一件事當然要試吓個湯啦，呈深啡色嘅湯底，視覺效果已經感覺到佢嘅濃郁，原來湯底用咗23種唔同嘅中藥材、天然牛脂、老薑、八角、紅蘿蔔、白蘿蔔等熬製而成，味道非常香濃，甚有層次。至於配了方面，份量非常足，牛筋入晒味，滑溜軟腍；牛肚爽口彈牙；腱心夠嫩滑，好驚喜。麵底方面揀咗手工麵，由於麵條厚薄長短不一，所以食嘅時候好有口感，非常掛湯，好滿足。