【A&M Diary】太平山山頂相信你都去過好多次，但大家主要都係去凌霄閣同山頂廣場，再睇吓香港嘅景色。原來山頂仲有一個Secret Garden，唔知你又有無去過呢？今日我就帶A姐嚟到呢個Secret Garden：山頂花園！呢度以英式風格庭園為主題，絕對係周末同拍拖好去處，仲適合大家帶埋毛孩嚟野餐打卡添。
前往方法
坐巴士或山頂纜車去到太平山山頂後，行大概20分鐘就會到達山頂花園；如果自鴐遊可以直達山頂花園最高嘅涼亭，嗰度設有約20個咪錶位，方便鴐駛人仕。
如果你係行路上去山頂花園，中途仲會經過柯士甸山遊樂場，記住入去行吓影相呀！
山頂花園
花園位處太平山，可能係香港最高嘅公園。而且花園有唔少枱凳，十分適合大家野餐。另外，山頂花園亦係寵物共享公園，記住帶埋毛孩嚟放電呀！
舊總督山頂別墅守衛室
總督山頂別墅建於1902年，採用蘇格蘭大宅建築風格，由於總督好少使用呢個別墅，加上受到香港保衛戰時嘅損毀，所以喺1946年拆毀，只保留守衛室。而守衛室屬新古典建築風格設計，除咗係法定古蹟，亦係花園嘅大門口。
英式庭園
通過守衛室嘅大門口就係英式庭園，呢度有唔少英式涼亭，好適合大家打卡架。
中央花園
但講到最受歡迎嘅就係呢個中央花園。花園嘅正中央為一個藍色嘅小涼亭，四周圍都種滿花，好有殖民地時期嘅色彩，亦吸引唔少人嚟呢度影婚紗相架！
