【A&M Diary】香港係一個宗教自由嘅地方，加上曾經為英國嘅殖民地，所以歷史上有唔少宗教團體都會植根香港，再面向中國；加上多元種族同文化背景，香港有超過三百萬人信奉唔同宗教。為咗了解更多有關香港嘅少數教派故事，我哋就參加咗Hong Kong Free Tours舉辦嘅香港宗教多元之旅一天團，走訪四間較少人認識嘅宗教：伊斯蘭教、印度教、耶穌基督後期聖徒教會（摩門教）同錫克教，深入宗教場所了解佢哋嘅故事，係一個充滿深度嘅旅行團呀！
行程
1.0：尖沙咀九龍公園集合->九龍清真寺和伊斯蘭中心->灣仔耶穌基督後期聖徒教會->跑馬地印度教寺廟
2.0：玩完行程1.0之後，我哋決定參加埋2.0版，深度了解錫克教（詳情）
提提你
1. 行程中會參觀唔少宗教場所，為咗尊重場合，請唔好著背心、吊帶、短裙、短褲、拖鞋、透視或緊身服裝
2. 所有宗教場所都係一個莊嚴嘅地方，遊覽時保持聲浪，保持應有嘅尊重，唔好騷擾信徒嘅崇拜活動
3. 尊重自己，尊重宗教
九龍清真寺和伊斯蘭中心
尖沙咀港鐵站A出口嘅九龍清真寺，行過路過就多，唔知入面係點嘅呢？伊斯蘭教係世界三大宗教之一，喺香港就有30萬伊斯蘭教嘅信徒，總共有6間清真寺，而全港最大嘅清真寺就係九龍清真寺和伊斯蘭中心（全港歷史最悠久嘅清真寺：綠色清真寺 半山些利街清真寺）。雖然九龍清真寺話係全港最大，但如果你有去過其他伊斯蘭國家參觀清真寺嘅話，香港呢開清真寺確實係蚊髀同牛髀。不過，入到去卻會有另一番感覺，繁忙嘅尖沙咀竟然會有一個咁寧靜嘅地方，形成強烈對比。清真寺入面非常解潔，信徒都會朝向住西面麥加嘅方向祈禱。由於我哋參加旅行團，所以九龍清真寺嘅負責人會向我哋示範信徒嘅祈禱方法，同解答我哋嘅提問，例如：點解男仔同女仔祈禱時要分開？點解一日要祈禱咁多次？不過我就唔喺呢度解釋喇，留俾你哋親身體會啦！
耶穌基督後期聖徒教會
耶穌基督後期聖徒教會嘅經文叫《摩爾門經》，所以佢哋嘅教派又被稱為摩門教。真心一句，耶穌基督後期聖徒教會嘅形象喺香港都幾負面，所以今日入嚟佢哋位於灣仔嘅教堂都有好多想法。原來耶穌基督後期聖徒教會嘅總部位於美國猶他州鹽湖城，雖然係一個相對年青嘅教會，但信徒就有超過1500萬人；雖然經常被稱為異端教會，但佢哋嘅家庭觀念好重；雖然佢哋有好多信條，但佢哋都係導人向善。喺呢個耶穌基督後期聖徒教會嘅行程，我哋就參觀咗佢哋灣仔大樓嘅課室、教堂，仲有唔少信徒解答我哋嘅提問，例如：佢哋傳教兩年嘅生活係點嘅呢？點解會相信呢個宗教？同樣地，我哋就唔喺呢度解釋喇，留俾你哋親身體會啦！
印度教寺廟
香港有唔少印度人，但印度廟就唔多。印度教被稱為世界上最古老教派，同中國嘅道教一樣，佢哋信奉嘅神好多。今日嚟到位於跑馬地嘅印度教寺廟，入到去寺廟內，會有三間小屋，供奉毗濕奴神、拉喜米等神明。呢間印度廟除咗祈禱之外，信徒仲可以冥想、參加靈修講座、練習瑜伽，以及訂婚、結婚同殯殮等儀式。我哋入廟前要先除鞋，印度廟嘅負責人更加會示範信徒嘅祈禱方法，同解答我哋嘅提問，例如：印度教嘅團拜時間？印度教嘅經文？臨走前，教會仲為我哋準備咗啲小食同飲品，更凸顯印度人嘅熱情添！
