【A&M Diary】駟馬拖車，其實係咩嚟？原來駟馬拖車係廣東潮汕地區一種大宅院，院內有好多院落、好多天井，係富豪人家嘅屋企。以大富人家嘅宅院命名，位於牛頭角嘅駟馬拖車潮州飯店，令呢一餐潮洲打冷一啲都唔麻甩，仲多咗份心思添。
海蜇手撕雞
海蜇同手撕雞預先撈勻，所以食嘅時候，同時食到爽脆嘅海蜇又食到嫩滑嘅雞絲，口感非常豐富！至於味道就以麻醬調味。令味道又滑又濃。
韭菜豬紅
每次食潮洲打冷都有兩樣嘢係我哋必叫，其中一樣一定係韭菜豬紅。呢碗韭菜豬紅份量夠晒多，豬紅唔會一咬就散，好有質感。味道方面，唔會太濃太鹹，帶有少少辣味，好有層次。
滷水鵝四拼盤
每次食潮洲打冷都有兩樣嘢係我哋必叫，另一樣一定係滷水鵝。呢個拼盤除咗滷水鵝，仲有紅腸、腩肉、腎、滷水蛋同豆腐。每一樣嘅食物都入晒滷水味，又香又濃！滷水鵝嘅鵝肉好滑溜，鵝肉味好香；一層肥一層瘦嘅腩肉雖然邪惡，但就好滋味；最重點嘅仲有豆腐，好香滑又入味。整體嚟講，都算非常抵食。
涼瓜排骨煲
至於小菜方面，我哋就叫咗涼瓜排骨煲，份量確實太多！涼瓜帶有少少苦味，卻絕對係我哋嘅最愛；排骨入味，肉質嫩滑。
