【A&M Diary】SABROSA！Sabrosa係西班牙文，意思係好味咁解。而西班牙一向俾人一種熱情不羈嘅感覺，如果將熱情不羈同好味連起，點解會有種色色嘅感覺？其實係銅鑼灣嘅西班牙餐廳SABROSA，餐廳設計走型格路線，但一束紅玫瑰，突顯西班牙情調，加上用心嘅製作，真係SABROSA！
焗西班牙走地黃油春雞
春雞焗到外皮香脆，一切開就已經有香味四溢嘅肉汁流出嚟，而肉質亦都保持到鮮嫩。至於配菜嘅薯角同埋紅蘿蔔條亦都不能忽視，兩者嘅外皮都炸到香脆，一咬落去都仲係好爽脆啊。
澳洲草飼肉眼牛扒
雖然草飼牛扒無穀飼牛扒咁多油脂，但濃郁嘅肉味絕對係完勝。五成熟牛扒一切開就見到粉嫩嘅肉色，加上微烤嘅焦香，令牛扒嘅味道更具層次。而配菜亦顯示到廚師嘅誠意，沙律菜混合左藜麥，加上帶微甜嘅番薯條，中和牛扒嘅飽滯感。
傳統西班牙蛋餅配風乾火腿
傳統西班牙菜又點可以唔食蛋餅呢？因為呢度嘅蛋餅比較多薯仔粒，口感比較紮實。配上風乾火腿，加上沙律醬同紅椒粉等調味，令到蛋餅嘅味道十分多元化！
