【A&M Diary】多謝你，伴我惶恐歲月中漂盪。不經不覺A姐M佬玩樂日記已經去到第八個年頭，多謝大家一直嘅支持。今日M佬約我喺中環煤氣燈柱等，原來係去位於中環都爺利街嘅A Lux慶祝，餐廳主打法國同意大利菜，環境寬敞舒適，食物都充滿驚喜。
精選餐包
一開始，餐廳送上精選餐包，我哋最鍾意香草麵包，外脆內軟，非常新鮮，配上橄欖油同意大利醋，開胃一流！
龍蝦湯
一嚟到就聞到好香嘅龍蝦味，入口幼滑細膩，龍蝦味濃郁，再配埋羅勒精油同乾邑泡沫，第一道菜已經真係好出色！
雜菌忌廉湯
雜菌忌廉湯係Soup of the day，由三種唔同嘅菇菌煮成，一啲都唔馬虎。菇味非常濃郁，入口細綿幼滑，再配合菇肉，十分滿足。
西班牙紅蝦意粉
西班牙紅蝦意粉係餐廳嘅招牌菜，西班牙紅蝦爽滑彈牙，配上用蝦膏同蝦殼煮成嘅醬汁，鮮味濃郁；意大利麵煮得啱啱好，掛滿紅蝦醬，非常惹味。
香煎鱸魚配大蜆
鱸魚煎得啱啱好，魚皮非常香脆，肉質鮮嫩多汁，再配上大蜆，蜆肉厚身，鮮味十足。
自家製意大利芝士蛋糕
我哋揀咗自家製Tiramisu，入口香滑，奶香味濃郁，再配合咖啡味，好有層次感，為呢個午餐劃上完美嘅句號。
