【A&M Diary】近年汽車露營大熱，除咗可以舒舒服服到郊外接觸大自然，小朋友仲可以盡情放電，當然唔少得影番幾張靚靚打卡相啦！香港依家有唔少適合汽車露營嘅地點，而且喺疫情過後，收費開始回落，玩得更抵呀！想趁盛夏來臨前，捉緊露營嘅尾巴？即睇10大必備汽車露營用品及汽車露營地點推介。
露營攻略完全制霸 | 汽車露營用品checklist
正所謂「工欲善其事，必先利其器」，所以出發前一定要準備好露營用品，如果唔係去到露營地點先發覺帶漏嘢，除咗影響露營心情之外，更重要係喺郊外搵唔到所需物資！
1. 帳幕
必備！最重要嘅裝備沒有之一！市面上選擇好多，可以視乎人數同所需空間決定，甚至可以另外購買客廳帳或天幕，咁成班朋友就可以喺呢個活動區度玩，甚至有遮風擋雨之用。
2. 防潮墊
將防潮墊鋪喺帳篷下面，可以隔絕地面濕氣及保護帳篷底布。
3. 露營雪櫃
想體驗野外炊飯，露營雪櫃真係唔少得！全個露營嘅食材都要靠露營雪櫃保鮮。但要特別注意露營雪櫃嘅大細，如果唔係就好難放入車尾箱。亦可考慮入手保溫箱, 隨時享受到冰凍飲品。
4. 煮食用具
喺露營期間煮飯，絕對係對一眾大廚同主婦嘅一大考驗！因為露營期間所使用嘅gas爐，同平時用開嘅唔同，唔知味道會唔會唔一樣呢？除咗gas爐，仲要預備水煲、平底鑊、湯煲、水杯、碗、餐具、罐頭刀、防風板等用具。
5. 營燈
入夜後嘅營地，非常黑，絕對需要準備營燈。有唔少人鍾意掛上露營燈串，增加氣氛同打卡。另外，你可以準備帳幕吊燈、電筒作為主要嘅燈光來源。
6. 睡袋、床墊
喺野外無記憶棉嘅床褥，真係好難入睡。想瞓得好啲嘅，就要準備充氣床墊同打氣機，咁都勉強叫做有張軟綿綿嘅床褥啦！另外，睡袋就可以作為保暖之用。
7. 露營櫈、露營枱
除非你話坐地下，或者坐返上車，否則需要露營櫈同露營枱。露營櫈同露營枱除咗係大家食嘢嘅地方，更加係大家玩Board Game、飲酒傾計嘅地方。
8. 個人用品
露營至少都玩兩日一夜，所以要準備好個人衣物、沖涼用品、刷牙用品、護膚用品等物資。
9. 食物、調味品
嘩！預備好露營雪櫃同煮食用具，唔好唔記得準備食物同調味品呀！即食麵、麵包、雞蛋、廚師腸、牛餐肉、罐頭、鹽、糖絕對係必須，但如果你對食有更高要求，不妨買塊牛扒、海鮮等，大顯身手！
10. 尿袋
有唔少人會買露營電箱，但如果電器唔多，只係單純叉吓電話，其實尿袋都可能夠用。
露營攻略完全制霸 | 汽車露營地點推介
