【Viu】「娜姐」周秀娜為《美麗香港人 • 情 • 事》短片拍攝計劃連續兩年擔任活動大使，噚日出席大會舉行嘅頒獎禮暨作品展。娜姐話近年有同好多新導演、幕後人員合作，每次拍攝都被佢哋嘅熱血感染，充滿動力！
講到佢早排拍劇身體keep住敏感多處泛紅，娜姐話可能拍攝虛耗極大體力、或者有壓力都唔知，就趁呢排休息調理身體。笑問會唔會想有位男伴喺唔舒服嗰陣呵護心靈？娜姐搞笑話：「佢又唔係醫生！」然後提起好姊妹Hailey陳俞希曾表示，若然主持嘅戀愛真人騷節目《戀愛Staycation》開明星季，想邀請埋佢參加一事，娜姐聽到即刻心動應邀：「咁正呀！」又話唔怕同好姊妹撞仔仔，仲透露對姊弟戀冇所謂添！
同場顏卓靈就以頒獎嘉賓現身，近日密密為主演新戲《失衡凶間》宣傳，戲內角色患有情緒病，佢自爆拍完都真係覺得自己「中招」，每日keep住崩潰情緒，幸好之後好快跳出角色。不過顏卓靈自言當中都有得着，對心理學知識產生濃厚興趣，希望未來向住呢個方向進修、發展。
