【香港Staycation】留一天與你喘息　港島香格里拉大酒店

【A&M Diary】近期疫情反覆，我哋少咗好多娛樂，真係好悶呀！所以M佬話：要留一天與你喘息。我哋7週年嘅慶祝活動就去港島香格里拉大酒店玩staycation啦！其實香格里拉聽就聽得多，但我哋都係第一次入住呢個品牌嘅酒店，估唔到喺整個入住過程充滿驚喜，所有員工嘅服務水準超高，讓我哋有一次好愉快嘅入住體驗！

酒店大堂
港島香格里拉大酒店位處港鐵三線（荃灣線、港島線、南港島線）交匯嘅金鐘站，去邊都好方便。仲唔怕日曬雨淋，10分鐘就由港鐵站嚟到港島香格里拉大酒店，而且全程都有電梯或扶手電梯，拎住大件行李都唔會狼狽。加上酒店喺正太古廣場上面，買嘢同補給日用品都好方便。

港島香格里拉大酒店喺1991年開幕，酒店大堂以深木身為主調，帶有古典奢華嘅感覺。另外，仲有一大盞水晶吊燈，屬於近年新酒店少見嘅裝飾，但喺90年代嘅五星酒店，水晶吊燈絕對係富麗堂皇嘅代表。整個check-in過程非常快速順暢，酒店嘅職員仲免費upgrade我哋入住豪華海景房同主動提議幫我哋安排late check-out至14:00，真係夠晒細心呀！正當我哋好開心有得upgrade嘅時候，酒店突然送上一紥玫瑰慶祝我哋嘅週年紀念，真係夠晒驚喜！收到花嘅A姐未上房已經好滿意呢間酒店喇！

喺上房之前，lobby仲有一大隻吉祥物Tony，一場嚟到就梗係要同Tony打卡啦！加上Tony又肥又大隻過我，坐喺佢隔離影相，絕對唔洗P圖呀！

藝術作品
港島香格里拉大酒店嘅signature當然就係《大好河山》啦。呢幅《大好河山》懸掛喺酒店中庭嘅41至56樓之間，呢幅作品足足有成16層樓高，由40位嚟自北京嘅藝術大師用咗半年時間製作。最佳嘅觀賞地點就係乘坐玻璃觀光電梯，由底至高欣賞。不過，呢部電梯同大部份香港人一樣，都係好快，如果可以慢少少就好喇！

房間區域
港島香格里拉大酒店共提供523間客房，其中包括34間套房。酒店近年分階段進行翻新工程，而我哋今次就入住位於53樓嘅豪華海景房。房間雖然唔係翻新咗嘅房間，但其實保養唔差，仲有唔少特點架！好似房間嘅樓底比較高，仲有水晶燈添，好有氣派。而且雙人床超大張，真係要唱「金絲雀」呀！床褥軟硬適中，床單柔軟，非常舒服；枕頭總共有4個，2個係軟2個係硬。兩邊都有床頭櫃，方便大家放眼鏡同電話，不過，就未有提供USB插頭，但酒店都預先安排咗充電線，彌補舊式房間嘅不足。至於窗簾遮光都ok，雖然朝早未至於全黑，但我哋都可以瞓到自然醒，差足電呀！

房間嘅景觀以銅鑼灣及灣仔一帶嘅城市景色，同維港對岸嘅景色為主，由於我哋入住樓層比較高，所以景觀非常開揚。而房間嘅電視除咗提供本地嘅頻道，亦有電影台、新聞台、體育台同外語頻道，選擇非常多；另外，亦可以連接自己部電話，想煲劇聽歌都可以自己話事啦！另外，書枱大大張，亦有提供常用嘅文具，夠晒貼心呢！

至於酒店嘅mini bar提供免費嘅蒸餾水、茶包同capsule咖啡之外，仲有其他收費嘅項目。至於我哋今次係慶祝周年紀念，所以酒店仲安排咗唔少驚喜，但我哋就唔劇透太多，保留呢份神秘感，等你哋下次自己嚟住嘅時候慢慢體驗。

浴室區域
港島香格里拉大酒店嘅沿室非常大，乾濕分離。浴室內設有兩個洗手盆，淋浴間、浴缸同洗pat pat馬桶。不過，你知啦，A姐我有40寸長腿，所以唯一挑剔個馬桶比較矮，坐得唔太舒服。另外，呢度嘅個人用品齊全，有牙刷、牙膏、梳、浴鹽、浴帽、化妝棉、剃鬚刀等等，至於洗頭水、沐浴露、護髮素同潤膚露就用上法國品牌：L’OCCITANE，房間已經放有兩set喺度，夠晒大方。至於衣櫃入面亦放有浴袍、拖鞋、體重磅、風筒、夾萬、雨傘、熨斗同燙衫板等。

娛樂設施
酒店設有健身中心、室內按摩浴池、按摩和美容護理室、室外按摩浴池、游泳池、桑拿同蒸汽房，不過喺疫情期間全部都冇開，我哋亦都無影到任何嘅相。

餐飲服務
港島香格里拉大酒店設有七間餐廳，分別係cafe TOO咖啡廳、高美食店、龍蝦吧餐廳、灘萬日本料理、夏宮、大堂酒廊同珀翠餐廳。至於今次staycation嘅早餐，就嚟到港島香格里拉大酒店最高，位於56樓嘅珀翠餐廳。

首先入到黎珀翠餐廳，絕對會比呢個無敵靚景深深吸引！至於早餐係半自助形式，主菜有多個選擇，分別有：純素滋選、英式早餐、日式早餐、中式早餐、班戟或比利時窩夫。我哋就揀咗港式早餐同粵式早餐。兩個早餐都非常豐富，其中港式早餐有火腿煎蛋蕃茄通心粉配花生醬西多士、煎腸粉同魚肉燒賣；至於粵式早餐就有手作竹昇麵及鮮蝦豬肉上湯雲吞配燒賣、鮮蝦餃、素餃、牛肉燒賣同奶皇包。特別一讚嘅係，餐廳知道M佬對奶類反感，細心將奶皇包轉成叉燒包。至於味道方面，整體都唔錯，特別鍾意自家製作嘅魚肉燒賣，魚味香濃，口感一流；至於西多士炸得香口，入邊嘅花生醬好香濃。成個點心拼盤最好味就係鮮蝦餃，蝦肉勁多勁彈牙！