【A&M Diary】放暑假就梗係要玩盡佢啦！計我話夏天玩水真的很興奮，所以我哋weekend就嚟到元朗大棠盛夏森林，呢度設有多條水上滑梯，又有適合小朋友嘅戲水設施，既可以消暑又可以盡情享受刺激快感！加上盛夏森林設有市集同表演，氣氛非常熱鬧，真係好似去咗台灣啲夏日趴呀！
門票
HK$88起，分為夜間及全日門票，唔同日子以及唔同區域，都會以唔同嘅手帶分辨，如果想玩水就記住選購水動森林嘅門票喇！購買門飛，可於Klook平台選購及預訂日子。
貼心防疫措施
喺疫情期間，玩水上活動最緊要係玩得放心，所以場內採取以下措施，令大家玩得安心！
1.場內所有人士，包括職員、訪客同遊玩人仕必須全程戴上口罩，如果玩水玩到口罩濕咗，園內亦提供免費口罩供遊客替換，
2.盛夏森林內嘅水已經過全面消毒並獲得認證，各區域亦會進行定時清潔及消毒，
3.入場前除咗要掃描 “安心出行” 或填寫個人資料表格，而進入園區時，必須通過消毒通道，
4.所有人仕進入盛夏森林前，必須接受體溫檢測，如體溫高於37.5°C、出現呼吸道感染病徵或忽然失去味覺或嗅覺，將不准進入。
前往方法
1.自駕遊：於地圖搜尋「大棠有機生態園」，全日泊嘅停車費用為HK$80，
2.接駁小巴：於港鐵朗屏站 (B1 出口) 乘搭紅色小巴，直達盛夏森林場地。 收費為每位每程HK$10，
3.港鐵巴士：於港鐵朗屏站 (B1 出口) 乘搭K66接駁巴士到大棠山道路口下車，沿小路步行約15分鐘即可到達，
4.專線小巴：喺元朗千色廣場斜對面乘搭 <元朗至大棠> 紅色專線小巴，到達總站再沿小路步行約15分鐘便可到達。
盛夏森林
分為三個遊樂區：
原野森林 – 設有滾筒競技及攤位遊戲，區來亦設有救護站同紀念品店，想同園內員工大玩水槍，呢度亦有得賣
樂活森林 – 設有餐飲市集同舞台表演
水動森林 – 設有多條適合大人同小朋友玩嘅水上滑梯。場內設有洗手間、更衣室、沖洗區同儲物室。另外，員工亦會手持水槍，同大家玩水戰，如果唔想濕身，就記住貼上呢個貼紙喇！
百米滑道@水動森林
長達100米嘅滑梯，只需要5秒就由最高點滑落，勁多尖叫聲，夠晒刺激！玩左幾次之後，坐喺度玩已經滿足唔到我哋，所以可以試吓趴喺度sir，衝力更快更刺激。（只適合12歲或以上或身高150厘米或以上的遊玩人士參加）
大象物語@水動森林
又大象鼻滑直接滑落水池，速度算快，適合喜歡速度嘅小朋友。（只適合4 – 11歲或以上及身高100厘米或以上的遊玩人士參加）
高拋滑梯@水動森林
接近垂直，臨落水前滑道會往上輕微拋起，快至2秒衝入水中。（只適合12歲或以上或身高150厘米或以上的遊玩人士參加）
森林之王障礙賽@水動森林
全長約100米，設有個障礙關卡。一開始跑上9米高滑梯，再高速滑下，之後手腳並用爬過唔同斜坡及障礙物。速度同體力決一不可，挑戰以技術同最快速度到達終點。（只適合6歲或以上或身高120厘米或以上的遊玩人士參加）
猩林探險@水動森林
由三條高矮唔同嘅滑梯組成，小朋友可以隨意喺水池同滑梯內穿梭，係小朋友放電嘅好地方。（只適合4 – 11歲或以上及身高100厘米或以上的遊玩人士參加 – 小童門票）
泰山飛索@水動森林
到達8米高的滑索頂部飛躍到對岸，呢個項目相對冇咁易濕身。（只適合12歲或以上或身高150厘米或以上的遊玩人士參加）
嚮食森林@樂活森林
玩到攰就可以嚟到樂活森林內嘅嚮食森林，呢度嘅嘢食仲有好多選擇，最重要係價錢一啲都唔貴，食完又可以入去再玩過！
大圍啤 – 熱辣辣最啱就係飲番杯啤酒，啤一啤佢！呢度嘅手工啤係由香港大圍製造，夠晒新鮮。手工啤酒嘅口味加入茶，例如加入玫瑰正山普洱、伯爵茶、熱情果茉莉、洋甘菊，令啤酒除咗帶有麥嘅香甜味，亦有茶嘅香味！特別鍾意熱情果茉莉嘅大圍啤，酸酸甜甜嘅熱情果加上茉莉嘅香味，味道好有層次又夠解喝。
大棠荔枝木香燒雞 – 如果想食荔枝木香燒雞，記住要提早30分鐘預約。除此之外，呢度亦有炸雞等小食。
Cafe de Forest – 想飲杯台式飲品或咖啡？就可以選擇Cafe de Forest！呢度仲有蛋糕、麵包等嘢食，可以自製一個mini high tea啦！
小食店 – 小食店嘅選擇超多，有炸魚薯條、椒鹽雞軟骨、炸金龍燒賣、油麻地小輪麵等等！記住一定要食椒鹽雞軟骨，炸得好香口，而且雞軟骨大大粒，食嘅時候好有口感，配埋啤酒就最夾喇！
綠元市集@樂活森林
食飽飽之後，可以順便行埋旁邊嘅綠元市集，呢度設有手繪同手作工作坊。
