【A&M Diary】搭小巴絕對係一個心理戰，特別係第一次坐嘅路線，嗌落車真係一個大難題。話雖如此，但小巴卻係代表香港人嘅一種生活文化。今日我哋就嚟到全港首間，位於佐敦嘅小巴文化資料館，呢度展出一系列紅van嘅歷史資料，其中1:1嘅紅van車頭，更加係影相打卡熱點。
小巴文化資料館
資料館嘅面積雖然唔大，但就有由1965年至今，有關小巴嘅剪報同歷史相片、舊式鐵皮錢箱同車頭目的地掛布等。
館內最受歡迎嘅展品，當然就係呢個1:1嘅紅van車頭啦！呢㗎小巴除咗引擎同冷氣之外，其他例如車頭燈、舦盤、波棍、水撥、車頭電動牌布機都係郁得㗎！再細心睇吓，連紅van常見嘅散銀架同手寫小巴牌插都有㗎！
補充：由於疫情關係，資料館目前只接受團體預約到訪，或可以參加不定期舉辦嘅導賞團同工作坊，以了解香港小巴歷史。
香港小巴歷史
香港小巴牌照分公為紅色公共小巴同綠色專線小巴兩種，早期小巴載客量係14座位，至依家最多為19人。因為紅van嘅規管較少，所以政府透過唔同制度限制紅van經營，所以截至2017年3月，全港只有1064架紅色小巴，相反綠色小巴就有3,286架，相信不久將來，紅色小巴會越嚟越少，甚至成為歷史。
