【A&M Diary】夏天開始慢慢嚟到，天氣越嚟越熱，除咗少咗行山同户外活動之外，就連麻辣火鍋都要減少啲，因為又辣又熱真係頂唔順呀！今日捉住冬天的尾巴，嚟到將軍澳嘅火焰山重慶火鍋，齋聽個名就知道呢間係主打食辣嘅地方啦！
日式鹽烤牛舌
等緊打邊爐嘅時候，我哋叫咗串燒，一邊食一邊等。一碟嘅鹽烤牛舌有兩串，燒到外層夠乾，但仲夠juicy，牛味香濃，值得推介。
醬料區
醬料選擇好多，除咗常見嘅辣椒粒、蒜蓉、芝麻、香蔥、芫荽、豉油、麻油等等之外，呢度仲有魔鬼辣椒粉同勁辣辣油，我只係落咗少少，發覺已經頂唔順。有興趣挑戰嘅，不妨試試。
鴛鴦鍋底
鴛鴦鍋底一邊揀咗中辣嘅重慶麻辣鍋，比預期中唔算辣，至少都唔使瘋狂飲水，值得一讚係用咗唔少香料，令湯底香味十足；至於另一邊鍋底就揀咗清湯，原來清湯即係菇湯，上枱嘅時候已經有唔少冬菇同金菇，菇味香濃。
美國安格斯肥牛
掛起嘅安格斯肥牛，配上乾冰營造嘅煙霧效果，擺盤夠晒靚。牛肉油脂分布均勻，肉味香濃，略嫌份量比較少。
秘製格格肉
所謂格格肉即係厚切粒粒豬頸肉，厚切嘅豬頸肉非常有口感，夠晒彈牙，好好味呀！
台灣鴨血
食麻辣鍋又點少得鴨血呢，鴨血由台灣空運直送，鴨血嫩滑，索晒麻辣湯，好惹味。
竹笙
同樣屬於「索湯」系列嘅竹笙，我哋將佢放入清湯，竹笙索晒香菇濃湯嘅味道，非常滿足。
水魷魚
魷魚就梗係要配麻辣湯啦，爽口彈牙，好味。
