【A&M Diary】今日放假，約咗喺中環返工嘅舊同事食lunch，仲記得以前我哋喺中環返工，趕住開會嘅我哋，都只會喺附近嘅茶記食下野，就趕返公司做埋啲手尾。以前其中一間屬於我哋嘅飯堂，就係位於中環中心隔離嘅紅城冰室。隔咗好耐冇嚟，原來喺旁邊，開咗一間食粉麵為主嘅紅城粉麵，又要趕返公司開會嘅佢，一於食個快嘅午餐啦！
酥炸菠菜餃
喺小食類入面，酥炸菠菜餃係唯一一個有手指公嘅推介認證，所以我哋都忍唔住叫咗一個嚟試試。菠菜餃即叫即炸，外皮夠晒鬆脆，而入面除咗有菠菜之外，仲有大大隻鮮蝦，好有口感，加埋泰式辣醬，味道更加吸引。
瑤柱京都炸醬撈麵
因為天氣比較熱，所以今日冇選擇到食湯麵，反而選擇咗撈麵。炸醬麵嘅麵底夠晒多，撈勻鋪面嘅肉絲、冬菇絲同瑤柱絲，夠晒豐富。炸醬麵唔算太辣，想再辣啲，可以加上放喺枱面嘅辣椒油，即刻又香又辣。
鮑汁冬菇花膠撈麵
如果想食得矜貴啲，呢度都有鮑汁冬菇花膠撈麵，花膠雖然唔算入味，但好彩夠軟腍。反而冬菇炆得好入味，仲有成五大隻添。麵底同樣夠多，但就略嫌鮑汁畀得較少，要撈勻成個麵就有啲難度。但勝在價錢唔算太貴，都幾抵食。
