【A&M Diary】每次去完一次長途旅行之後，擁有香港胃嘅我哋，最掛住嘅一定係香港嘅嘢食。落機連時間都未適應，就要食啲嘢，話俾我哋個胃知，我哋返到香港喇！至於尋找香港本土味道，當然要去到旺角啦！雲吞麵係我哋嘅comfort food，嚟到旺角許榮記飲食專家，慰藉一下久違嘅味道。
秘製豬手飯
如果係第一次食許榮記飲食專家，就梗係要試吓佢哋嘅秘製豬手飯啦！隻隻豬手都有拳頭咁大隻，而且滷水味滲透豬手嘅每一個部份，非常入味，而且豬手嘅骨膠原非常豐富，真係淡淡都好滋味。
西洋菜餃崩沙腩河粉
另一必食推介係佢哋自家嘅西洋菜餃，西洋菜嘅菜味香濃，而豬肉令湯汁更豐富，口感同層次俱備；至於崩沙腩嘅筋膜薄而口感彈牙，筋膜帶肉而且烹調時間恰到好處，肉質軟腍。另外，索晒腩汁嘅河粉，夠晒滑溜，加埋一齊就係完美嘅配搭。
