【A&M Diary】喺香港有唔少小店都好有特色，值得我哋去細味同發掘！而上環除咗有唔少舊香港情懷嘅餐廳，都有唔同嘅菜式，呢間榮華南洋冰室顧名思義就係主打南洋風，由裝修以至餐牌設計都好有南洋風味，我哋放假嚟到，就享受一吓慢活嘅一天啦！
泰式鳳爪
鳳爪少少酸又少少辣，好開胃！而鳳爪份量好多，好抵食。
常餐
常餐可以話係每間冰室menu嘅必有項目，當然榮華南洋冰室都有。呢度除咗可以選擇福麵做底，亦可以選擇檬粉或轉配咖央多士。而最抵讚係個香茅豬扒，香茅味超香濃，豬扒入味，而肉質唔會死實，加上香腸、火腿同炒蛋，呢個常餐夠晒豐富。
海南雞髀飯
食南洋美食，又點少得海南雞飯呢？呢度嘅海南雞飯配上雞髀，重點係唔洗加錢，好抵食呀！雞髀已預先去骨，食落啖啖肉，又香又滑，配上泰式辣醬或薑油，味道層次又係另一境界。
