【A&M Diary】明明A姐都無睇韓劇一排，但近期佢公司嘅admin同事介紹，A姐又再沉醉追韓劇嘅日子，當佢顆韓國心又再燃起，我又多咗食韓國菜嘅機會喇！之前食過佐敦嘅平昌，今次就去同集團嘅旺角兆萬平昌啦。
鰻魚
任燒任叫嘅鰻魚外層微焦，無骨肉厚，最正當然係個鰻魚汁，好惹味！
烤LA牛排骨
醃到入晒味嘅牛仔骨係另一推介，牛味香濃，骨唔會黐住啲肉。
午餐肉
午餐肉夠晒厚切，唔會鬆鬆散散，應該係嚟自韓國嘅午餐肉。
烤五花腩
五花腩肥瘦分明，食落唔油膩，夠晒腍，豬肉味夠晒香。
烤牛脷
厚切嘅烤牛脷，牛肉味豐富，仲好有口感，加少少麻油鹽就更提升牛脷嘅味道。
