【A&M Diary】曾經，「香港」係世界一流嘅品牌，但近年好多人都話呢個品牌開始暗淡，逐漸失去昔日嘅光彩，有一啲香港品牌甚至已經消失呢！當年嘅許留山因為一系列嘅芒果甜品成名，連Twins都唱：「讓我們結伴探訪許留山」，但後嚟由於太過著重遊客市場，令香港所有分店敵不過疫情而執笠。如果想回味許留山嘅芒果甜品，原來喺世界各地仍有少量分店，其中包括英國嘅諾定咸。
多芒小丸子
望住餐牌上嘅甜品，真係充滿回憶：多芒西米撈、多芒亮晶晶、芒果糯米糍、芒之戀、芒椰蘆薈爽等等，唔知你又最鍾意邊款芒果甜品呢？我哋就最鍾意多芒小丸子，估唔到芒果非常香甜，而且成碗多芒小丸子都夠晒冰凍，加上煙煙韌韌嘅小丸子，同埋芒果雪糕，絕對係當年香港嘅味道！
