【Now新聞台】英格蘭超級聯賽，白禮頓作客水晶宮，半場落後一球之下，憑慕比補時階段的入球，迫和1比1，錯失升上榜首的機會。
干拿加拉加的勁射登克解圍，水晶宮初段攻勢不少但不到肉。反而白禮頓站穩陣腳，簡單直接的攻勢差點開紀錄。門將羅拔山齊士大腳送前，皮球一彈地韋碧克就到，但埋門挑不過出迎的古亞達，錯失領先機會。
半場補時干拿加拉加的突圍，博到白禮頓犯規獲得十二碼。
古古尼也出手，托沙出膊頭，干拿加拉加給反應，操刀的沙夏一射入網，為水晶宮半場領先。
他們換邊後有機會拉開，後備入替的賓迪基傳了給對方的古古尼也，但古古尼也一傳，又被干拿加拉加截到，踢了他都還有賓迪基橫傳給佐敦艾耶。
大好機會射不入，但維持紀錄贏的都是水晶宮。
假如白禮頓今場贏的話，就會是創會120年來，首次於頂級聯賽排名第一，沙恩德菲尾段助攻頭槌不入。
眼見三分在望的水晶宮，去到補時4分鐘多，古亞達大腳開出，被白禮頓的費文一腳送前，接應的慕比一腳笠過古亞達，為白禮頓迫和1比1搶回一分。雖然上不到榜首，但就跟曼城、車路士、曼聯以及愛華頓同得13分，排聯賽第六。
