【Now新聞台】英格蘭超級足球聯賽曼聯作客尾段，憑住連加特的入球，加上迪基亞撲出十二碼，協助球隊2比1擊敗韋斯咸，開季五場不敗。
曼聯花了廿幾分鐘，才爭取到第一個似樣攻門。般奴費蘭迪斯的「窩利」，韋斯咸門將法比安斯基手指尖觸到再中柱彈出。但曼聯仍然未改善到初段已經有「甩漏」的防守，賓哈馬娥眉月的射門，省到人改變方向入網，30分鐘主場的韋斯咸領先。原來省中華拉尼，迪基亞都很無奈。
但曼聯勝在有C朗回歸，接應般奴費蘭迪斯的過頭波，第一腳被擋再補中，35分鐘追平，回歸以來踢三場都有入球。
雙方換邊後戰況一度膠著，曼聯其後調入連加特、山曹及馬迪，終於在89分鐘由馬迪交給連加特射掛網，上季外借到韋斯咸的連加特倒戈入球助曼聯超前。
但在補時耶莫蘭高迫到梳爾禁區犯手球，韋斯咸獲得十二碼。領隊莫耶斯立即調入盧保，但未熱夠身就主射十二碼，迪基亞撲出，做英雄，曼聯驚濤駭浪下險勝2比1。
倫敦打吡，白衫的熱刺迎戰車路士，兩隊半場無紀錄。車路士領隊杜曹換邊後隨即調入干堤，加強中場控制，只是短短4分鐘，博到的角球就有收穫。馬高斯阿朗素處理，泰亞高施華頂入，替車路士打破僵局。
客軍57分鐘再改寫比數，干堤離門廿幾碼的射門，皮球省到迪亞，羅利斯只能目送皮球中柱後彈入。換邊後只是12分鐘，車路士由零變二。
踢到補時，添姆雲拿助攻魯迪加「埋齊」，車路士大勝3比0。
