【A&M Diary】台式火鍋、日式火鍋、四川火鍋同港式火鍋堪稱火鍋界嘅四大天王，主要分別在於湯底同食材，其中以養生湯底為賣點嘅台式火鍋最深得我心！嚟到位於荃灣嘅馬祖台灣養生湯麵館，餐廳推出台式90分鐘全日半任食火鍋，仲可以一人一鍋，時限內可以無限添加自取區嘅配料，額外再送任飲即沖台式飲品，價錢非常抵食，推介必食嘅台灣食材有麻辣鴨血凍豆腐鍋、手打牛丸、台灣腸、甜不辣、新竹米粉等，真係以為自己去咗台灣呢！
湯底
馬祖台灣養生湯麵館採一人一鍋，火鍋湯底超過十款選擇，例如：麻辣蕃茄牛肉鍋、台灣養生藥膳雞鍋、麻辣鴨血凍豆腐鍋、台灣麻辣牛肉鍋等。我哋揀咗日本壽喜燒湯同藥膳田園蕃茄濃湯，其中藥膳田園蕃茄濃湯嘅蕃茄味濃郁，酸酸甜甜夠晒惹味。
Prime Grade牛肩胛肉
火鍋套餐包一碟 Prime Grade牛肩胛肉，油花分佈平均，牛味香濃，牛肩胛肉切得非常薄，輕輕一淥就食得。
西班牙無激素豬肉片
除咗牛肉之外，套餐仲包一碟西班牙無激素豬肉片，豬味香濃，肉質嫩滑，同樣切得非常薄，刀功了得。
