【Now新聞台】截至早上11點，1小時內《彭博》用戶關注度上升最多嘅港股，依次為中國飛鶴、國泰航空、創科實業、信義玻璃、申洲國際。
乳業股今日成板升晒上去，其中飛鶴本身冇乜特別消息，雖然飛鶴8月時有股東增持，9月底公司又回購股份，但股價都係冇乜起色，依家市盈率(PE)跌到13倍左右，係咪代表飛鶴抵買？
京華山一國際研究部主管彭偉新指，好多投資者買貨都會吼股價殘、股東增持、公司回購呢啲時間，因為預期股價之後會向上，不過，飛鶴喺50天線阻力比較大，RSI喺50水平，睇返技術形態都未見真正突破，後市要留意破唔破到50天線，如果破到有機會吸引更多資金追入。
