【Now新聞台】截至早上11點，1小時內《彭博》用戶關注度上升最多嘅港股，依次為聯想集團、紫金礦業、合景泰富集團、華南城、美團。
聯想集團今朝股價急挫，上個禮拜先話發CDR要回A，股價受刺激炒起，券商野村仲話，可以參考中芯國際、中國中車、上海復旦公布回A股計劃後，股價急升嘅表現，點知聯想轉個頭就話要終止回A，點解無啦啦會咁？
圓通環球金融集團行政總裁曾永堅指，今次聯想終止回A嘅消息其實真係估佢唔到，雖然野村指今次事年或受政治因素或受公眾壓力，但呢嗰講法未必真，因為今次煞停回A，據聯想自己嘅講法，係因為財務數據需要更新，所以現時最重要嘅係睇返聯想回A後，對公司實質營運嘅影響，今日嘅股價就反映市場對公司潛在價值嘅睇法唔太樂觀。
