【A&M Diary】尖沙咀有唔少星級品牌酒店，相信大家近期都玩咗唔少Staycation，仲留低唔少腳毛添！今次我哋住嘅Staycation就冷門啲，嚟到位於尖沙咀山林道嘅山林舍。山林舍以深色木系為主題嘅精品酒店，雖然新開張，但住過嘅朋友都大讚酒店私隱度高，價錢平之餘，口碑仲相當唔錯。
酒店大堂
山林舍位於尖沙咀山林道，大概行5分鐘，就可以去到佐敦港鐵站或前往彌敦道搭乘往各區嘅巴士路線。由於山林舍位處山林道，落街就有好多餐廳選擇，附近仲有人氣日式超市，想行街買嘢同補給日用品都夠晒方便！
山林舍嘅check-in counter位於4樓，check-in採用自助登記入住系統，只要將身份證或護照放上自助系統就可以辦理手續。酒店除咗提供過夜，亦提供時鐘住宿服務，大家亦可以直接嚟到山林舍，透過自助系統即時比錢就可以入住。至於匙卡同一般酒店唔同，採用收據紙，紙上印有QR code以乘搭電梯同進入房間。所以check-out嘅時候，可以直接將收據紙撕掉。由於全程唔駛接觸前台職員，所以住過嘅人都大讚私隱度夠晒高！另外，提提你，酒店並不接受18歲或以下人士入住架！
房間區域
山林舍一共提供82間客房，分為5種房型：標準客房、優越客房、豪華客房、行政套房同頂層套房。酒店以深色木系為主題，無論大堂、走廊定房間都好有格調，感覺非常有質感。由於酒店嘅標準客房都只係HK$350左右一晚，所以M佬今次話住豪啲，入住21樓頂層，最高級嘅頂層套房。
頂層套房嘅樓底非常高，房間面積達330呎，空間感十足。房內配備39寸LED電視，基本電視頻道都有齊。但最大賣點就係呢度嘅景觀，由於附近嘅大廈唔算太高，所以位處21樓嘅我哋可以飽覽尖沙咀及九龍公園嘅景色，加上今日天氣唔錯，可以睇到山頂凌霄閣、ICC同IFC，甚至遠眺西面嘅海景，窗外風景夠晒開揚。
雙人床屬於King size，床褥採用鬆軟舒適嘅蓆夢思床墊，軟硬度適中，而床單非常柔軟，枕頭總共有2個，床嘅兩邊都有床頭櫃，亦有插頭位方便充電。房間嘅窗簾遮光度唔錯，朝早亦無被陽光騷擾，整體睡眠質素唔錯。唯一美中不足係房內無梳化或凳，只可以坐床或地下。
浴室區域
講到成間房最值回票價，當然就係浴室內嘅浴缸。我哋特意帶咗浴鹽嚟浸浴，真係好有日本嘅感覺呀！浴室乾濕分離，除咗浴缸仲有企缸。至於個人用品除咗牙刷、牙膏，仲有自家品牌嘅沐浴露，味道都幾香，如果有需要就自行攜帶啦！另外，房內亦有提供拖鞋同風筒。
除咗今次入住嘅頂層套房，酒店仲有其他房型，同樣以深色木系為主題，其實好有無印嘅感覺，住起上嚟非常舒服，一齊睇埋其他房型啦！
